Recents in Beach

Bodo Poetry | Boro Poems

Bodo Poetry

आंगो हादोद
Angw Hadwd

                                   अनिल बर' (Anil Boro)

 

Bodo Poetry, Boro Poems
bodo-poetry













बिब्दिनो गले गले जिनाहारि जायो आंनि हादोद

गोमालांनाय सिमांफोरबादिनो रानज्रिंलाङो

उन्दै समनि गलापनि थफिजेननाय

समनि जिनज्रिं बसना बिसोर फैयो आरो थाङो

खोमसि आसुगुरजों थबस्र बसयो

मोजां मोननायनि रोदा।

गोसोम हाखराव फबनानै दोनो

बिखानि अखाफोर

लैथोमानिफ्राय हाजोमासिम

दा बोहैयो दुखुनि दैसा।

दान खोमसि हराव जोंथा-माथा सोरां

सान ओंखारबोलानो साग्लोबो नख्रांसे खोमसि

रावबो खेवा खुगा

खोमसियाव दोनखोमायो

गाव गाव आखाइ।

बिब्दिनो गले गले जिनाहारि जायो आंनि हादोद

सोरनि थाखाय नागिरनो आं

अखाफोरनि आबादनि फोथार

बिसोर खोमानालाबाय आंगो लामा

जुनात् आखुनि फेंख्रायनायानो

जायो जेब्ला जिउनि जोंमा

सोर रोजाबनो थैनोरोङै खन्थाइ?

बारफुंहोगोन सोर

खुदियाफोरनि खुगायाव बिबारनि बारग्लांनाय

बारहोगोन सोर जिउनि बिबार

बुंफबहोगोन आबादजों

थैसाम खानाय फोथार।

बिब्दोन गले गले जिनाहारि जायो आंनि हादोद

नारसिनजायो सुबुंथि।

थेवब्लाबो उन्दुबाय थायो भीष्म।

रोजाबबावदो आरोबाव खेबसे फोथायथिनि मेथाइ

हे आंनि हानि सुबुं

मायनि खिलिनायबादि गां फुवारनानै

खर दिखांनानै नाइ नख्रांसिम

फोथायथिनि गंनै आखाइ।

*****

Bodo Poetry | गोरोन्थिया नोंनिल नङामोन | Gwrwnthia Nwngnilo Nongamwn

दै

Dwi

                                           अनिल बर' (Anil Boro)

 

गामिनि आबादथिलियाव

दैबाना।

दैनि

मनग्लाबनायाउ

हां थिफुं आंनि

गोर्बोनि गामिनि लोगो।

दैनि

सुन्दाउरि गोहोनि फाखनाव

आंनि आंगो

हालुवा लोगोनि बिखानि हा।

फार्सेनिफ्राय

सुस्लिमनानै लाबोगौ

आंनि गामिनि न – बां

मोसौ मैसो

गय खान्थाल फाथैनि बारी।

जेरैबो दै

जेरावबो दै,

आंनि गामिखौ

मनग्लाबनानै दं

सुन्दाउरि दै

अनजिमागैयि दैनि लैथोमा।

दैनि मोनसे सोदोबथिआ

जिउ

बिदिब्ला

जिउनि गुबुन

सोदोबथिआ

फोजोबनाय।

दै अर बार हा बिसोर

जिउनि गुबुन मुं

आरो जिउनि बेरेखा बिन्दोआव

गसंनानै मुलुगनि बेरेखा बिन्दोआव

गसंनानै मुलुगनि फोजोबनायनि

नंगुबै मुं।

*****

Bodo Poetry

आलाखाला हार्सिङै

Ala Khala Harsingwi

                           इसान मोसाहारी (Ishan Mwshahary)

 

Bodo Poetry, Boro Poems
bodo-poetry









आलाखाला हार्सिङै थाबाइदोंमोन आं

एसेयावनो नुवासै हिनजावसा सासे मा एसे मोजां

मिनिखैरो गुसथि मोखाङा गेवलां

सोमखेयैनो खान्थै गोनां मेगन बेरस्रां;

रेसम बादि खानाइया गोदोनाखं सायाव

गेलेदों देलाइ लाइ मोदोमफ्रु बाराव;

जारां जाब्रोद दखना बिनि मोदोमाव,

समाइदों रमाइदों गुफुर गावदां।

नुनानै बिनि गोदै रुकखौ

नंबाइ आं माबा माबा जुदा गोसोखौ।

बुंफबबाय बिखायाव गोसो थोनाइजों

मा मोदानो मा बिलाइ सुदेम गोजों।

दावगासै आं थानाइयाव गोसोथोनायाव

मिथिया आं नाथाइ मानो मादि नंनानै,

मिनिखैरो मिनिनानै थांबाय बियोदि।

*****


समा जाबाय

Soma Jabai
               
     इसान मोसाहारी (Ishan Mwshahary)

 

समा जाबाय---

आंनि थांनायनि समा खाथि सफैबाय।

गोसोजों गोसो मा गान्थि जोंहा दंमोन,

मेगनजों मेगन जा मोसा नांहाबदोंमोन,

खेवनांसिगोन दालाय समा जाबाय।

 

Boro Poetry, Boro Poem
boro-poetry









आय’ ! आलो उन्दुनाय यै देलाय

मिथिबाय? नोङो मिथिबाय?

नोंनि सिखोला बैसोनि मेगन बेरस्रांङा,

मिनि सुलु-सुलु बालें जारौ गुस्थिया,

रुम्बां खानाइ, लाजिगुसु खावलाय जाब्रबआ

मानोबा आंखौ बोथाबबाय –

गान्थि खेवनायनि समा जाबाय

सान अखाफोर हाथर्खिया गोजों जाबाय।

 

आंनि खोमसि लामाखौ बिसोरो सोरां होबाय;

थांनोसै सना थांनोसै आं,

हनै आंखौ थांनो लिंहरबाय –

गान्थि खेवनायनि समा जाबाय।

दिनै आं गुरै नंलिया –

नंलियाबो आंङो अनसुला,

लाइमोन आखान्थिनि गोबानायाव

नंलिया आङो फाग्ला।

 

जायनि थाखाय फाग्ला आं बिनि लागैसो ओंखारबाय

दिनै बिखौनो नागिरबाय, -

गान्थि खेवनायनि समा जाबाय।

*****

 

सिमांनि सैनाय

Simangni Swinai

           सीतानाथ ब्रह्म चौधुरी (Sitanath Brahma Choudhury)

 

Boro Poetry, Boro Poem
boro-poetry


आय सिमांनि सैनाय

सिमाङावनो था रजे मोकथाङाव दाफै।

नोंनि लाजिस्लु मिनिखैरेनाय

मेगन खनाजों हाइना सारफावनाय

रोमोदो दखनाजों जोंब्लाउखांनाय

महरा थाथों सिमाङावनो।

सिमाङावनो रजे गोजोनग्लाय होफै

रजे मोकथाङाव दाफै।

जालाखाद बुंनाय मुलुग बिखायाव

लाइमोन नोङो माबोरै थावरिनो?

दाइना मोखांनि खामलाबनाय नोजोराव

रैरुब बिबारा रहायो हायावोनो।

दाफै नों दाफै सिमांनि सैनाय

जालाखाद होननाय मुलुगाव दानुजाफै,

सिमां हादरनि हाइना लाबोनानै

सिमाङावनो रजे गोजोनग्लाय होफै;

नोंनि दखना थावसि मोदोमनाय

जारौ गुसुथिनि मिनिखैरेनाय,

आदा होननानै मेगन मोहेरनाय

दौबा बेखेवनानै गय जाहोनाय।

बेफोर सैनाय सिमांनि बेसाद।

सिमाङावनो नों लानानै फै

नोंनि गुफुं बिखानि दुंबुरुद फिथिखा

सिमाङावनो रजे लुफावना होफै,

नों दाफै

सैनाय दाइना मोखाङाव दा नुजाफै।

******

 

फैफिन
Fwifin

                                       रामदास बर' (Ramdas Boro)

 

हे बिलोगो

नोंनि सानथ्रहायै सिमांनि

मोनसे सिमांआबो

जायगा मोनाबोला

अननाइनि जिराइथिलिआव,

आंनि गोसोनि फिसा खसालिया

अराइबो गेंना थाबाय

नोंनिनो थाखै,

फैफिन नों, दागि,

हाबफैफिन

आंनि बे खसालिआव।

गोजोन लामाजों

हारसिङै थांनाइआव

लोगो मोनफ्लांओ बोला

लोगो गोमानाइ मासे दावब

लिंनानै लाबोफा बिखौबो नोंजों

दागारबो हारसिङै

लामा गेजेराव।

Bodo Poetry, Bodo Poem
bodo-poem








बिजोंनो एफा एनै

बाख्रा रायज्लाइनानै

रेजें होनो हागोन नोंनि

मोनाबिलि गिलिद गोसोखौ।

सुग्लाइहोनो हागोन नोंनि

गोसोनि दुंहाव दाहाखौ।

बेखौनो नेनानै थाबाय

सिथलानि बे थुलुसिया,

नोंल इसेबो दागिल फैनो।

गोसोनि मानसिया बुंसनो हायाबोला

नोंनि आंनि जिउनि लोगो

फोथायगोनना लोगो नोङो

थांनाइनि समाव बे,

खमफि खमफि जोंना थानाय

साथिनि खमफिनाय बादि

खमफिदों आंनि गोसोआबो

नोंनि थाखाय।

हे लोगो, फैफिन नों दागिल

हाबफैफिन आंनि बे खलासिआव।

*****

Bodo Poetry

सासे बादारि मोनथाम सावगारि
Sase Badari Mwntham Saogari

                                अरबिन्द उजिर (Arbinda Ujir)

 

(1)

सिमाङाव बिखौ

सोरबा होसो गारदोंमोन

आरो बियो

जोबोत मेंग्रुदोंमोन

सिरिमोनब्ला नुया

बिनि सेरावनो

बैसाङाव थुबथानानै

गंसे जिलित्।

(2)

हांसो सिलारिनि गाङाव

बिरबोनाय फुंनि सोराङा

सानजौफुनि हाग्रा गुदुआव

जिराइ हैयो

बादारिनि रुवायाव

सानजौफुनि मेंनाय।

Bodo Poetry, Bodo Poem
bodo-poem

(3)

शाल दंफांनि गेजेरजों

     साना लरेत मावखाङो

सानजौफुनि सिरि थीहाबनाया

     बेलासिनि रिंखांश्री जायो,

बेलासिनि रिंखांश्रीया लाहैयो

     बेलारोमनि सनाश्री महर।

सोमखोर सोमखोर आयनायाव

     सनाश्रीया नायो

गावखौनो गाव।

सोनाबनि खुदुमनायाव

     सनाश्रीनि गोसोम खानाया

अखराङाव बिरफुङो

     बादारीनि उन उन

मेंग्रुनाय गोसोम खानाय।

*****


गामि गोदान
Gami Gwdan

                        प्रमद चन्द्र ब्रह्म (Pramad Chandra Brahma)

 

Bodo Poetry, Bodo Poem
bodo-poetry








गोजामनि बारै गामि गोदान,

नुनो मोनाब्लाबो गोगोम गोथां।

दैमा जिंनि गहब खनायाव

दिमोल खुन्दानि निजोम सेराव,

थुमखा-थुमखि खासि गेजेरनि बैग्रिबारि,

सिं सिं देरा फिसा लानथिरि,

बेयावनो गामि गोदानखौ फाथिदोङो।

गोदान गोदान मानसि खारबोदोङो।

लुनो उदायैफ्रा बिफां साफ्रावनो बासा लादों।

खायसेयबा लांदां-फांदांनो थाद्लाबायदों

बियावनो आबै-आबौआ, आइ-आफामोनहा

गोदान संसार फाथिहैदों,

मोदोम गोदान हि-जोम गोदान।

बिनि हाल खदाला, बिनि संनाय-खावनाया

बिनि बिसा-बिसाया, बिनि गाबनाय मिनिनाया

सिमां लागायनाय, सान्द्रासि साग्लोबनाय

     देवान मैया मैया।

नुहां-नुवाहां मिथिहां-मिथियाहां सायामाया,

खोनायो गोजाननिफ्रा सोरबाफोर गोजाम देराखौ

गारनानै बियो गाहैबोला,

दलै-नोगोरै बिसोरो बेखौ बरायलायनानै लाफैयो,

खोनायो खामफ्रामनाय समफ्लआ बिसोरनि

थावसिन नांसिन खाजा;

बिखौ जानानैनो बिसोर थैया मोनदाङा देरजा देरजा

हांगार हुंगार बेगें बेलानो जेबो बिसोर जायो।

बिसोरो जोंनि खाथि खाथि थायो रायज्लायबायो।

नाथाय बिसोरखौ नुवा, बिसोरखौ खोनाया

हायरे बेसेबां दुखुनि बाथ्रा बियो।

बिखौनो बुंदों गोथैबारि-

जोंनि उनावनि हायना गोनां हायखुंसि हायफुरि।

नुवा नुसवाब्लाबो मिथिना लाखा।

सानसे बेलासे बियावनो थांनांगोनखा।

*****


Reference Book: 

सुजुनाय बिजाब-

"खन्थाइ बिहुं"       अनिल बर'



 


Post a Comment

0 Comments