Recents in Beach

New Bodo Romantic Poem

New Bodo Romantic Poem 

Daimu Daimary


आरो थांनांगौ दंबावो

 

New Bodo Romantic Poem, Bodo Love Poem
new-bodo-romantic-poem


नों हायोबा नाजा ओंखारनो, बे गोब्राब लामानिफ्राय

नोंनि थांखिनि लामाया, दाबोनो सफैथआखै

 

दाजा नों एरैनो दिखार, नोंनि हान्थिनायखौ नायना

जि फोथायनायखौ लाना फैदोंमोन, बे फोथायनाया दाबो आद्रा दंबावो

 

समहा माखासे हरबो थायो, बेफोर नोंखौ सोमावग्लुं खागोन

नों गावखौल दिदोमै लाखि, गासै आसायानो दाबो दंबावो

 

जागोन नों हारसिं, बिबदिबो सानसे सम सफैगोन

दानागार नोंनि उदिस, नोंनि थांनांगौआ दाबो दंबावो

 

जेब्ला जागोन नों लोरबां, थाबायफिन नों बेखौल सान्ना

आरो आगान्नैल गोजानावसै, बेनि हिसाबा आरो दंबावो

 

मोनसेल बे खोन्दो, आंनि जिउनि बाहागोनि

आंनि रेबगनजों लोगोसे, जिउनि गुबै बाथ्राया दाबो दंबावो

                                ******

 Bodo Khonthai




दिनैबो नों गोथाङै दं रजे

 

मोले ले जालांनाय बै सावगारियाव

दिनैबो बबेबा खनायाव गोथाङै दं नों रजे

गोरबोनि बै दरखं मोखाङाव

दिनैबो नों गसंफैयो।

बयबो हास्थायसोलायो दिनैबो

बै लांदां जायगाखौ सुफुंनो।

मेगन्नि बै फैसालिया

दिनैबो नोंखौल नायनो खाराव माराव जायो।

समनि मोनफ्रोमबो बुब्लियाव

दिनैबो नोंखौल नागिरो।

रायज्लायनायनि बै सोदोबफोराव

दिनैबो नोंखौल रायखांनो हास्थायो।

बयबो सोंसोलायो

दिनैबो नों मानो इसेबां गोसोखैङो ??

रंजानायनि बै बुब्लिफोराव

दिनैबो नंनिनो मुं फैयो।

बयबो नोंखौ लिंहरसोलायो

थेवबो मानो नों फैदिया ?

जेब्ला समा दुखुजों बुंफबनाय जायो

दिनैबो नोंनि बै फोरोंनायखौनो गोसोआव फैयो।

सोरहाबा बिबदि गोहो दंमोन नामा ?

दिनै नोंनो लोगोआव गैला।।

बेसेबा खोथा बुंनांगौ दंमोन

दिनैबो बबेबा खनायाव गोथाङै दं नों रजे।।

            ********

 Bodo Sad Poem

Bodo Poetry | Hathorkhi Hala


आं बेसे मोजां मोनो

 

नोंनि मिनिखैरेनाय,

मेगनजों मेगन जाब्ला नायख्लेंनाय,

आं मिथि हसि नोंनि खाथियाव थांनाय,

नोंनि लाजिस्लुयै नायगंनाय,

     हाय.... आं बेसे मोजां मोनो।

 

आंनि नोंसिनि लांगोनाजों बेरायग्लांहैनाय,

नोंनि दैखराव दै खावफैनाय,

आथिं सुस्रलांनाय,

     हाय.... आं बेसे मोजां मोनो।

 

आं नोंसिनि दुब्लिजों मोसौ होलांफ्लानाय,

नोंनि माय गायनायाव सान्दंजों जाहाबनाय खावलाय,

आदै नुजाहां दखना गान्नाय,

     हाय.... आं बेसे मोजां मोनो।

 

नोंनि सेराव खोनागौबा काजल फुन्नायखौ बाखनायनाय,

अखानायै नोंनि काजल फुन्ना देलायनाय,

आंनि थाखै नोंनि गुस्थियाव गोजा गाब गानाय,

     हाय.... आं बेसे मोजां मोनो।

 

आंनि थाखै सौराय एवना होफैनाय,

आं जानायनि सिगां नोंनि खनजालांनाय,

आं नायहरबा उसाव बादाव जानाय,

     हाय.... आं बेसे मोजां मोनो।

 

दाय गैया सोबोर गैया नोंखौ एरैनो रागा फोजोंनाय,

जेबो खोथा गैया बाथ्रा गैया नोंजों एरैनो नांज्लायनाय

     अह.... आं बेसे मोजां मोनो।।

                                 ******

 Bodo Poetry


अखाफोराव न

 

अखाफोराव न लुनो होंगो दोंगो।

जेथिंबो दावराव दावसि

जेरावबो सेलाय बेलाय

दोआव गारसन्ना दोनजानाय खांख्राय बादि

बयबो गोजौआव गाखोनो नागिरो

सोरबाया इसे गोजौआव सहैब्ला

सोरबाया दाबुजों खेबख्लायो।

बिबदि मोले हाथासि बोथोराव

त्रैन होबथानायनि रिंखांनाय सोदोब

लैहोर लैहोर Devide Assam 50/50 नि

सावगारिया मेगन फैसालियाव

मानोबा फिर फिर बिरफैदों।

जेनबा बै सुबुं गौमायाव

मुस्रि गान्ना नुजाथिफैनाय फोरनि

होंगो दोंगोआव दखना गिब्रुलांनाय

आइ सनाथिया आंखौ नागिरबायदों

नाथाय बहामोन आं ??

ओजों थांब्लाबो मुस्रि गान्नाय।

हजों थांब्लाबो मुस्रि गान्नाय।

आय बिमा जाबायदों नों हालाय हाफाय।

सोरबाया बोदों फैसालि हमना

सोरबाया बोगथाबदों दखना रुबै

आरो सोरबाया बोख्लाबदों दौबा

सनानि आगरजों सिरायनाय दखनाया

जाबाय नोंनि जिरा जिथा।

फागुन दान्नि थिं थिं सान्दुंजों खामजासै

माग दान्नि मोलेले निहोरनि सुहाबनायजों

थन्थ्रलांसै लांदां देहाया नोंनि।

आइ सनाथि बिमा

खालामदों नोंनि जिख्लाबनाय देहायाव

जिनाहरि गले आरो गले।

सोर गानहोबावगोन नोंनि देहायाव

गांसे सोमखोर आगरनि दखना थावसि

आरो बेसे सहायहोबावगोन नोंखौ

नोंनि आंगोफोरा।

आयै खोनादों अखाफोराव न लुनो

होंगो दोंगो जादों नोंनि फिसाफ्रा

नोंनि नोंसाला गिदिर बासिरामा

फंबाय अनिरामखौ सैला

नोंसाजो उन्दै मैनाथिया

बिब लाइस्रिखौ सहायनो हाला

नोंखौ नायफिन्नो रावहाबो सम गैला

बयनोबो नांगौ अखाफोराव न

                    ******

 

 

 

 

 

 

 

 

Post a Comment

0 Comments