Recents in Beach

Bodo Folk Tales | Kids Stories In Bodo

Bodo Folk Tales | Kids Stories In Bodo


जेरै खामानि एरै फिथाइ

 

मोनसे हाग्रामायाव मासे सियाल आरो मासे दावब थायोमोन। बिसोर सानैबो जोबोद मोजां लोगोमोन। बिखायनो बिसोर सानसेखालि हाग्रामानि रायजोफोरखौ लिंनानै रायजो देखा बिसुखे खायो।

Bodo Folk Tales, Kids Stories in Bodo
bodo-folk-tales

Bodo Folk Literature

Bodo Folk Tales, Bodo Kids Story
bodo-folk-tales

     बिसुखे खाखांना गोबां दिननि उनाव सानसे खालि सियाला बिसुखे दावबखौ गावनि नआव आलासि जानो लिंहरबाय। मोजां दिन नायना दावबआबो बिलोगो सियालनि नआव आलासि जानो थाङो। ओजों सियाला ना बेदरनि अनला ओंख्रि संना तेबोलआव साजायना दोनखादों। सानैजों दसे सुखु दुखुनि खोथा सावरायलायनायनि उनाव सियाला दावबखौ ओंखाम जानो लिंलाङो। तेबोल सायाव बेसेबा गुवार थोरसियाव लाव लाव अनला बेदरनि ओंख्रि मोदोमफब लायनाय। सियाला बिलोगो दावबखौ जादो सुखे होन्ना गावहा स्लाब स्लाब सोलाना जायो। ओजों दावबआ जानो नागिरबाबो जानो हायाखै। बेसेबा गोलाव खुगा दावबनि बे लाव लाव अनला ओंख्रिखौ बोरै जालायखो। बेसेबा नाजानाय उनावबो दावबआ खबसेबो जानो हायासै। खुगायाव खुदै मननानो थानांबाय। फारसेथिं सियाला सोलास्लिब लायना गासैखौबो जाजोबो लादेर लादेर। उदै बुंजासे जाखांना बिलोगो दावबखौ जायै नुना सियाला बुङो – आया सुखे नोंलाय माथो जानोनो हाथारा ओंखायनो नों रान्थें थें होन्ना दावबनि थोरसिखौबो सोलास्लिब जोबना जाजोबो। जाखां लोंखां सियाला दावबखौ सोङो ओंख्रिया बोरै जाखो गोथाव जादोंना जायाखै होन्ना। दावबआबो बुंफिनो - सुखे जोबोद गोथावमोन नों संनाय अनला ओंख्रिया आं मालाबाबो बावनो हानाय नङा नोंनि बे इसिबां गोथाव ओंख्रिखौ। दाथ नों आंनो जाहोबाय आंनि नआवबो आलासि जानो थांथारनांगोन सुखे होन्ना बिसुखे सियालखौ बुङो दावबआ। सियालनि नआव सानफाथोलो उखैजानांना दावबआ बिसुखे सियालखौ बिनि खिथेर लाथारगोन होन्ना गोसोआलनो सानखुमाना बिदाय लाना गावनि न फारसे ओंखारलाङो। सियाला गोसोआव सानखुमायो आंनि नआव बेदर जानो फैदोंमोन आंलाय मानो एरैनो जाहोनो नोंनो दावब’ ? नों मिथिया आं नोंखौ मानो बिलोगो खादों। नों आंनो बिलोनिफ्राय ना खांख्राय हमना जाहोफैनोसो आं नोंजों बिसुखे खादों। गोसोआवनो गोसो सानखुमाना सियाला मिनिखुमायो।


Bodo Kids Story

     बिदिनो सान्नैसो सम बारलांना सियाला सानो दावबआ गासैबो खोथाखौ बावजोबबाय खोमा होन्ना आरो बियो दावबनि नआव आलासि जानो थाङो। दावबआबो बिसुखे सियाल फैनायनि खुसियाव बेदर ना खांख्राय बायदि बायदि गोथाव गोथाव ओंख्रि संना दोनदों। सियाला गोथाव गोथाव मोदोमनायजों खदै गलायदोंसै माला मोनजागोन सान्ना। बिदिनो रायज्लाय होनज्लाय दावबआ सियालखौ ओंखाम जानो लिंलाङो। तेबोल सायाव औवा हासुङाव ना बेदर खांख्राय साजायना दोन्दों। दावबआ सियालखौ जानो होयो आरो गावहाबो खुगाखौ हासुङाव सोहरना बेसेबा गोथावै जु जु जायो। ओजों सियाला खुगायानो हाबजाया औवा हासुङाव। बेसेबा नाजानायनि उनावबो दरसेबो जानो हायासै सियाला। दावबआ थेलेब जाखांना सियालखौ सोंङो सुखे बोरै जाखो संनायाबा गोथावमोन्ना होन्ना। अब्ला सियालाबो लाजिना फिनो जोबोद गोथावमोन सुखे होन्ना। सियाला बिसुखे दावबखौ बिदाय लाना गावनि न फारसे थाङो। बियो मिथिबायदि गाव दावबखौ जेरै खालामदोंमोन बिनि फिथायखौ मोनबाय होन्ना।

*******

Bodo Folk Story 

सोलो गोरा बान्दर

 

मोसने हाग्रामायाव मासे बान्दर थायोमोन। बियो जोबोद सोलोगोरा मोन। बियो फांसे थायजौ बिफांआव थायोमोन। बे थायजौ बिफांनि सेरावनो मोनसे दैमाबो बोहैयोमोन। बे दैमायाव मासे गोरियाल थायोमोन। बान्दरा सानफ्रोमबो थायजौ फिथाय जाना बिगुरखौ दैयाव गारहरबाय थायोमोन। बेखौ नुना गोरियाला सानसे थायजौ बिफां सायाव नायदाव हरबा बिफाङाव मासे देरफुनाय मोदोम बह्रा बान्दर नुहुरो। बेखौ नुना गोरियाला जानो लुबैनाया थानो हायै जायो, बेसे गोथाव जागोन बे बान्दरा जानो सानफ्रोमबो गोमोन गोमोन थायजौ जानाया खम मेजेम बह्रा जाना दंबे होन्ना। नाथाय बोरै जानो बियो दंफां सायाव थायो आरो गावहा दैयाव। बेखायनो बियो मोनसे सोलो बानायो। बान्दरजों लोगो जाफ्लानो।

Bodo Folk Tales, Bodo Folk Story
bodo-folk-tales


     गोरियाला लासै लासै सानफ्रोमबो दै जिङाव फैना बान्दरजों रायज्लायफैग्रा जायो। बान्दराबो गोरियालजों रायज्लायना जोबोद मोजां मोनग्रा जाबाय। बान्दरा सानफ्रोमबो गोरियालनो जानो थायजौ खाना दैयाव गारना हरो आरो गोरियालाबो खुगा हुस्लिब हुस्लिब जायो। बिदिनो समफोरा बारलाङो।

प्रमिला Pramila | Bodo Short Story

Bodo Folk Tales, Bodo Kids Story
bodo-folk-tales


    सानसे गोरियाला बान्दरखौ गावजों लोगो जानायखौ नुना मोनसे सोलो बाहायो। बियो बान्दरखौ बुङो – लोगो बान्दर नोंथ
आंनो इसेबां थायजौ जाहोयो गोथाव गोथाव नाथाय दिनैसिम आं नोंनो जेबो जाहोनो हायाखै। बेखायनो दिनै आंनि नआव आलासि जानो थांनो थौ होन्ना। बान्दरा बुंफिनो लोगो गोरियाल आं बोरियाव थायो आरो नों दैयाव, आं बोरै दैयाव थांनो हानो। अब्ला गोरियाला फिनो नोंखौ आं बिखुंआव बानासो लांगोन नों दैयाव ओंखारनो नाङा। बान्दरा दसे सानहाबो। बान्दरनि सानहाबनायखौ नुना गोरियाला बुङो – नों जेबो गिनो नाङा आं थानायाव नोंखौ रावबो जेबो खालामनो हाया। आं दंना नों गिनो नाङा बायदि बायदि। बान्दरखौ बियो गोदै गोदै फुस्लायना गाहायाव लिंहरो। बान्दराबो गोरियालनि गोदै गोदै बाथ्राखौ फोथायना दंफां सानिफ्राय दै सेराव ओंखारबोयो। गोरियाला बान्दरखौ बिखुङाव गाखोहोना दै गेजेर फारसे जावलाङो।

Bodo Kids Story

     गोरियाला दिनै जोबोद खुसि गाव इसेबां दिन सिगां बान्दरखौ जानो लुबैनाया दिनै जाफुंसिगोन होन्ना। गोसोआवनो गोसो मिनिखुमागासिनो बियो। जानो लुबैनाया खुदै गलायथारदोंसै, थेवबो दसे धर्ज हमना थाथदों दै गोथौ सहैजासे। बान्दराबो जेसेनो दै गोथौ फारसे सहैदों एसेनो गोसोआव सानखांनाय फैदों जे गोरियालाथ दै सिङावसो थायो बिबदियाव आं बोरै दै सिङाव थांनो हानो। निस्सय बे गोरियाला आंखौ जानोयो दैयाव लाबोदों। बेखायनो बियो गोरियालनि फान्दायनायखौ हमनो हाना गोरियालखौ बुंथियो - लोगो गोरियाल दिनै आं नआव थायजौखौनो जायाखै उदैया खालि जाना दं। ओंखायनो देहाखौबो दुरबल मोनथारदों। आं नआव माखासे थायजौ जाना फैनि देहाखौ थाजिम मोनगोन  आरो लामायाव जालांनोबो थायनैसो खाना लाबोनि होन्ना। अब्ला गोरियालाबो गोसोआवनो सानो - दे उदै बुंजासे थायजौ जाबा बान्दरखौ जानोबो गोथावसिन जागोन। दाथ बियो आंखौ फोथायखायोसै आरो आंजों नआव थांफानोबो राजि जाखाबाय। आंजों जाजानाय सिगां उदै बुंजासे थायजौ जाना लाखाथों सान्ना गोरियाला बान्दरनि खोथाबादि बान्दरखौ रुगुंआव लाबोना दिनफैफिनो। बान्दरा गोरियालनि बिखुंनिफ्राय बोरियाव फिनज्राब बारहरना थायजौ बिफां सायाव गोजौआव गाखोलांना गोरियालखौ बुंहरो – अ गोरियाल नों आंखौ जानोसो नोंनि नआव दै सिङाव लाना थांदोंमोन नों। आंखौ मिथिया सान्दों नों ? नोंजे आंजों मानो लोगो जाफ्लादोंमोन ? आंखौ जानो थाखैसो। जामबा गोरियाल आरो आंखौ बोरियाव दोनफैफिनबावबाय लभिया नों। जा नो आंखौ मोनहायोबा होन्ना ओरै बाज्ल हरै बाज्ल दंफां सा सा बारदिंग्लायना बान्दरा गोरियालखौ एदावो। गोरियाला बेसेरा खुदै गनायैनो दै गेजेर फारसे हाबसुलांफिनो।

     बान्दरा गावनि सोलोनि गेजेरजोंनो गावखौ सुथुरनि खुगानिफ्राय रैखा खालामो।

******

 


Post a Comment

0 Comments